હવામાન વિભાગની આગાહી મુજબ ગુજરાતમાં ઉનાળાની મધ્યે વાતાવરણમાં મોટો પલટો આવ્યો છે. કચ્છ અને સૌરાષ્ટ્ર સહિત રાજ્યના વિવિધ જિલ્લાઓમાં 3 એપ્રિલ સુધી કમોસમી વરસાદની ભીતિ સેવાઈ રહી છે, જેની અસર હેઠળ આજે અમરેલી જિલ્લામાં પવન અને ગાજવીજ સાથે વરસાદી માહોલ જામ્યો છે.

અમરેલીના ગ્રામીણ વિસ્તારોમાં વરસાદી માહોલ

આજે 29 માર્ચ, 2026ની સાંજે અમરેલી જિલ્લાના વાતાવરણમાં અચાનક પલટો જોવા મળ્યો હતો. સાવરકુંડલા, ખાંભા અને ગીર પંથકના ગ્રામ્ય વિસ્તારોમાં તેજ પવન સાથે કમોસમી વરસાદ (માવઠું) વરસ્યો છે.

સાવરકુંડલા પંથક: સાવરકુંડલાના જાબાળ, બાઢડા, મોટા ઝીંઝુડા, સાકરપરા અને અભરામપરા જેવા ગામોમાં વરસાદી ઝાપટાં પડ્યા હતા.

ખાંભા પંથક: ખાંભાના જીક્યાળી અને ધજડી સહિતના પંથકમાં પવન સાથે વરસાદ પડતા માર્ગો ભીના થયા હતા.

ખેડૂતોની ચિંતામાં વધારો

ભર ઉનાળે થયેલા આ કમોસમી વરસાદને કારણે જગતનો તાત મુશ્કેલીમાં મુકાયો છે. ખાસ કરીને આંબાના પાકને (કેરી) આ માવઠાથી ભારે નુકસાન થવાની ભીતિ છે. આ ઉપરાંત ઉનાળુ પાક જેવા કે તલ, બાજરી અને મગફળી માં પણ નુકસાનીની આશંકા સેવાઈ રહી છે.