ઈરાનના નવા સુપ્રીમ લીડર આયતુલ્લાહ મોજતબા ખામેનેઈને પદ સંભાળ્યાને લગભગ બે અઠવાડિયા થઈ ગયા છે, પરંતુ તેઓ હજુ સુધી જાહેરમાં દેખાયા નથી. 28 ફેબ્રુઆરી, 2026ના રોજ અમેરિકા અને ઈઝરાયેલના સંયુક્ત હુમલામાં તેમના પિતા અને પૂર્વ સુપ્રીમ લીડર આયતુલ્લાહ અલી ખામેનેઈનું મોત થયું હતું. આ હુમલા બાદ 9 માર્ચે મોજતબા ખામેનેઈને નવા સુપ્રીમ લીડર તરીકે જાહેર કરવામાં આવ્યા હતા.

તેમની નિમણૂક બાદ 12 માર્ચે તેમનો પ્રથમ નિવેદન જાહેર થયું હતું અને ૨૦ માર્ચે પર્સિયન નવા વર્ષ નવરોઝના અવસર પર તેમનો સંદેશ પ્રસારિત થયો હતો. બંને વખત તેઓ વ્યક્તિગત રૂપે સામે આવ્યા નહીં, બલ્કે ઈરાની સરકારી ટીવીએ તેમના લેખિત અથવા રેકોર્ડેડ સંદેશ વાંચી સંભળાવ્યા હતા. આનાથી મોજતબા ખામેનેઈની સ્થિતિ અંગે રહસ્ય વધુ ગાઢ બન્યું છે.

મોજતબા ખામેનેઈ જીવિત છે કે નહીં?
આ સવાલ ઉઠી રહ્યો છે કે શું ઈરાનના નવા સુપ્રીમ લીડર જીવિત છે. જોકે, ઈઝરાયેલી મીડિયા અને અમેરિકી અધિકારીઓના જણાવ્યા અનુસાર મોજતબા જીવિત છે, પરંતુ તેમના પર દેશનું વાસ્તવિક નિયંત્રણ નથી. યરુશલેમ પોસ્ટ અને અન્ય સ્ત્રોતોના અહેવાલ મુજબ, ઈરાનમાં અસલ સત્તા ઈસ્લામિક રિવોલ્યુશનરી ગાર્ડ કોર્પ્સ (IRGC)ના હાથમાં છે. મોજતબા રાજકીય વ્યવસ્થા પર પોતાનું અધિકાર સ્થાપિત કરી શક્યા નથી.

હુમલામાં ઘાયલ થયાના અહેવાલ
ઈઝરાયેલી મીડિયા અને અમેરિકી સ્ત્રોતોના જણાવ્યા અનુસાર, 28 ફેબ્રુઆરીના હુમલામાં મોજતબા ખામેનેઈ ઘાયલ થયા હતા. તેમના પગમાં ઈજા થઈ હોવાની શક્યતા વ્યક્ત કરવામાં આવી છે, જેમાં તેમને ફ્રેક્ચર અથવા અન્ય ઈજાઓ થઈ હોઈ શકે છે. જોકે, તેઓ હજુ પણ શારીરિક રીતે કેટલીક પ્રવૃત્તિઓ કરવા સક્ષમ છે. આ જ હુમલામાં તેમના પિતા સહિત પરિવારના અનેક સભ્યોનું મોત થયું હતું.

અમેરિકી ખુફિયા બ્રીફિંગમાં ચર્ચા
એક્સિઓસને આપેલી માહિતીમાં અમેરિકી અધિકારીએ કહ્યું કે, "અમને નથી લાગતું કે ઈરાનીઓએ મરેલા સુપ્રીમ લીડરને પસંદ કરવા માટે આટલી મહેનત કરી હશે." રાષ્ટ્રપતિ ડોનાલ્ડ ટ્રમ્પની ખુફિયા બ્રીફિંગમાં પણ મોજતબાની ગેરહાજરી મુખ્ય વિષય રહી છે. અમેરિકી રાષ્ટ્રીય સુરક્ષા ટીમ તેહરાનમાં વાસ્તવિક સત્તા કોના હાથમાં છે તેનું મૂલ્યાંકન કરી રહી છે.

ઈઝરાયેલી નિષ્ણાતનો અભિપ્રાય
તેલ અવીવના નેશનલ સિક્યોરિટી સ્ટડીઝ ઈન્સ્ટિટ્યૂટના ઈરાન નિષ્ણાત રાઝ ઝિમ્ટે એક્સિઓસને જણાવ્યું કે, વર્તમાન સુરક્ષા પરિસ્થિતિમાં નવા સુપ્રીમ લીડરનું જાહેરમાં સામે આવવાની શક્યતા ઓછી છે. આ દરમિયાન ઈઝરાયેલે ઈરાનના ઉચ્ચ અધિકારીઓને લગાતાર નિશાન બનાવ્યા છે. ૧૭ માર્ચે ઈઝરાયેલે ઈરાનના રાષ્ટ્રીય સુરક્ષા પ્રમુખ અલી લારિજાનીને મારી નાખ્યા હતા.