અમેરિકા અને ઈઝરાયેલ તરફથી ઈરાન વિરુદ્ધ શરૂ કરવામાં આવેલા યુદ્ધની જવાબદારી હવે અમેરિકી રાષ્ટ્રપતિ ડોનાલ્ડ ટ્રમ્પ પર આવી રહી છે ત્યારે ટેનેસીમાં એક જાહેર કાર્યક્રમ દરમિયાન ટ્રમ્પે આ યુદ્ધ શરૂ કરવાની જવાબદારી પોતાના રક્ષા સચિવ પીટ હેગસેથ પર નાખી દીધી છે. આ કાર્યક્રમમાં હેગસેથ ટ્રમ્પની બાજુમાં જ બેઠા હતા. આ દરમિયાન ટ્રમ્પે કહ્યું, “પીટ, મને લાગે છે કે તમે જ સૌપ્રથમ બોલ્યા હતા અને તમે કહ્યું હતું કે ચાલો આ કરીએ, કારણ કે તમે તેમને પરમાણુ હથિયાર હાંસલ કરવા નહીં દો.”

ટ્રમ્પે શું કહ્યું?
આ ટિપ્પણીએ વોશિંગ્ટનમાં ખૂબ ચર્ચા જગાવી છે. અધિકારીઓ અને વિશ્લેષકો ચર્ચા કરી રહ્યા છે કે વહીવટીતંત્રમાં કોણે ઈરાન વિરુદ્ધ અમેરિકી સૈન્ય અભિયાન માટે સૌથી વધુ જોર આપ્યું હતું. ટ્રમ્પે કહ્યું, “મેં પીટને ફોન કર્યો, મેં જનરલ (ડેન) કેનને ફોન કર્યો. મેં અમારા ઘણા સારા લોકોને ફોન કર્યા અને કહ્યું કે ચાલો વાત કરીએ. મિડલ ઈસ્ટમાં અમારી સામે એક સમસ્યા છે.”

મિડલ ઈસ્ટમાં નાનું અભિયાન ચલાવીને સમસ્યાને હંમેશા માટે ખતમ કરી શકીએ
તેમણે આગળ કહ્યું, “અમારી પાસે એક દેશ છે જેને ઈરાન તરીકે ઓળખવામાં આવે છે, જે 47 વર્ષથી માત્ર આતંક ફેલાવી રહ્યો છે અને તેઓ પરમાણુ હથિયાર હાંસલ કરવાની ખૂબ નજીક છે. અમે આગળ વધતા રહી શકીએ અને તે 50 હજાર સૈનિકોની સંખ્યા વધારીને 55 કે 60 હજાર કરી શકીએ. તેનો કોઈ અંત નથી અથવા પછી અમે રોકાઈને મિડલ ઈસ્ટમાં એક નાનું અભિયાન ચલાવીને આ મોટી સમસ્યાને હંમેશા માટે ખતમ કરી શકીએ.”

હેગસેથ તરફ વળીને ટ્રમ્પે કહ્યું, “અને પીટ, મને લાગે છે કે સૌપ્રથમ બોલનાર તમે જ હતા અને તમે કહ્યું હતું કે ‘ચાલો આ કરીએ, કારણ કે તમે તેમને પરમાણુ હથિયાર હાંસલ કરવા નહીં દો.’”

ઈરાન સાથે વાતચીતનો દાવો
ટ્રમ્પે હેગસેથની પ્રશંસા કરી અને દાવો કર્યો કે અમેરિકા તેહરાન સાથે “ખૂબ સારી” વાતચીત કરી રહ્યું છે. જો કે ઈરાનના સરકારી મીડિયાએ બંને વિરોધી દેશો વચ્ચે કોઈ વાતચીતની અફવાઓને નકારી કાઢી છે. આ યુદ્ધ ફેબ્રુઆરીના અંતમાં અમેરિકાના હુમલાઓ સાથે શરૂ થયું હતું અને હવે તે એક મોટા પ્રાદેશિક સંઘર્ષમાં ફેરવાઈ ગયું છે, જેમાં ઈરાન અને તેના સાથીદારો પણ સામેલ છે.