સંસદ અને વિધાનસભાઓમાં મહિલાઓની ભાગીદારી વધારવા માટે કેન્દ્ર સરકાર સક્રિય બની છે. સંસદીય બાબતોના મંત્રી કિરેન રિજિજુએ રાજ્યસભામાં જાહેરાત કરી છે કે ગુરુવારે સંસદ મુલતવી રાખવામાં આવશે અને બે થી ત્રણ અઠવાડિયા પછી મહિલા અનામત જેવા અત્યંત મહત્વપૂર્ણ બિલ પર ચર્ચા કરવા માટે 2 થી 3 દિવસ માટે ફરીથી સંસદ બોલાવવામાં આવશે.

80 ટકાથી વધુ પક્ષો સાથે ચર્ચા પૂર્ણ, સર્વાનુમતે બિલ પસાર કરવાનો લક્ષ્યાંક 

સંસદીય બાબતોના મંત્રી કિરેન રિજિજુએ ગૃહને માહિતી આપતા જણાવ્યું હતું કે, આગામી વિશેષ બેઠકમાં આ 'ખૂબ જ મહત્વપૂર્ણ' બિલ પર ચર્ચા કરવામાં આવશે અને નિર્ણય લેવાશે. સરકાર આ બિલને સર્વાનુમતે પસાર કરાવવા માટે પ્રયાસ કરી રહી છે અને આ દિશામાં 80 ટકાથી વધુ રાજકીય પક્ષો સાથે ચર્ચા પણ પૂર્ણ કરી લેવામાં આવી છે. જોકે, આ બિલ અંગેની સત્તાવાર વિગતો હજુ સુધી જાહેર કરવામાં આવી નથી.

કોંગ્રેસની સર્વપક્ષીય બેઠક બોલાવવાની માંગ 

આ મુદ્દે રાજ્યસભામાં વિરોધ પક્ષના નેતા મલ્લિકાર્જુન ખડગેએ સરકાર સમક્ષ એક સર્વપક્ષીય બેઠક બોલાવવાની માંગ ઉઠાવી છે. તેમણે સ્પષ્ટ કર્યું હતું કે કોંગ્રેસ પાર્ટી મહિલા અનામત બિલની વિરુદ્ધ નથી, પરંતુ આટલા મહત્વના મુદ્દે અંતિમ નિર્ણય લેતા પહેલા તમામ રાજકીય પક્ષોના મંતવ્યો જાણવા અત્યંત જરૂરી છે. અગાઉ કોંગ્રેસના વરિષ્ઠ નેતા જયરામ રમેશે પણ સરકારને પત્ર લખીને એવી રજૂઆત કરી હતી કે વિધાનસભાની ચૂંટણીઓ પૂર્ણ થયા બાદ જ સંસદ બોલાવવામાં આવે.

આજે રાજ્યસભામાં બે મહત્વપૂર્ણ બિલ પર ચર્ચા 

કોંગ્રેસ નેતા જયરામ રમેશે ગૃહમાં સરકારના કાયદાકીય કાર્યસૂચિ અંગે સ્પષ્ટતા માંગી હતી. જેના જવાબમાં મંત્રી કિરેન રિજિજુએ જણાવ્યું હતું કે, સંસદ મુલતવી રાખતા પહેલા આજે રાજ્યસભામાં બે અગત્યના બિલો પર ચર્ચા કરીને તેને પસાર કરવામાં આવશે. જેમાં 'આંધ્રપ્રદેશ પુનર્ગઠન સુધારા બિલ' અને 'જાહેર ટ્રસ્ટ સુધારા બિલ'નો સમાવેશ થાય છે.

લાંબા સમયથી પડતર એવા આ મહિલા અનામત બિલને સરકાર હવે સક્રિયપણે આગળ ધપાવી રહી છે. જો આગામી સત્રમાં આ બિલ પસાર થઈ જશે, તો સંસદ અને રાજ્યોની વિધાનસભાઓમાં મહિલાઓની રાજકીય ભાગીદારીમાં ઐતિહાસિક વધારો જોવા મળશે.